Notanterahana ny 29 aprily 2023, tao amin’ny kianja Barea Mahamasina, ny valan-dresaka ho an’ny mpanao gazety narahina atrikasa mahakasika ny ady amin’ny fidorohana zava-mahadomelina isan’izany ny « Rôrô », izay niarahana tamin’ny fikambanana Tanora maro samihafa.
Miantraika sy miparitaka eny anivon’ny fiaraha-monina indrindra eo amin’ny tanora izany amin’izao fotoana izao.
Manana andraikitra lehibe manoloana izany ny fikambanana rehetra misehatra amin’ny Tanora sy ireo andrim-panjakana hifarimbona hiady amin’izany hoy Andriamatoa André Haja RESAMPA, Minisitry ny Tanora sy ny Fanatanjahantena nandritra ny lahateniny.
Ny asa vita mandritra ity atrik’asa ity dia ho entina eo anatrehan’ny Governemanta handinihana ny fomba hanatanterahana aingana sy hijerena ireo vahaolana manoloana izao zava-manjo ny Tanora Malagasy izao.
Nandritra izany dia nanazava sy nanao famelabelarana momba izany, Ramatoa RAJAONARISON Bertille Hortense, Profesora Neuropsychiatre ary mpampianatra eny amin’ny sampa-mpampianarana Médecine, izay nanazava ny fiantraikan’izany amin’ny fahasalamana, ara-tsosialy ary ny ara ekonomika.
