Notanterahana ny 23 desambra 2025 teny amin’ny QG Tanora, Ankorondrano, ny fivoriana voalohany izay mahakasika ny fanavaozana ny politika nasionalin’ny tanora (PNJ) .
Ao anatin’ny ezaka fanohanan’ny Fanjakana ny tanora malagasy sy manoloana ireo fiovana ara-politika, ara-toekarena ary ara-tsosialy miseho ankehitriny, dia nanapa-kevitra ny Minisiteran’ny Tanora sy ny Fanatanjahantena ny hanatanteraka ny fanavaozana ny Politika Nasionalin’ny Tanora (PNJ). Ity dingana ity dia mikendry ny hampifanaraka ny PNJ amin’ireo laharam-pahamehana nasionaly sy ny tena filàn’ny tanora.
Ny tanjona ankapoben’ny fanavaozana dia ny fametrahana politika vaovao mirindra sy mahomby, ahafahan’ny tanora mandray anjara mavitrika amin’ny fampandrosoana ny firenena.
Mifototra amin’ny fanombanana ny PNJ misy ankehitriny, ny fifampidinihana amin’ny tanora sy ireo mpisehatra rehetra manomboka eny ifotony ka hatrany amin’ny sehatra nasionaly ny fanavaozana. Hapetraka ny komity iombonana hiandraikitra ny fizotran’ny asa, ary hofaranana amin’ny fanomanana ny volavolan-dalàna vaovao, alohan’ny hanolorana azy eny amin’ny Governemanta sy ny Antenimiera.
Notarihin’ny Tale Jeneraly misahana ny Tanora ny fivoriana, niaraka tamin’ny Talen’ny Kabinetra, ary notronin’ireo tompon’andraikitra isan-tsokajiny, niampy ireo tanora sy solontenan’ny fikambanana tanora.