Nitsidika ny minisitry ny Tanora sy ny Fanatanjahantena, Andriamatoa Alain Désiré Rasambany, ny zoma 7 novambra 2025 tao Ambohijatovo ny solontenan’ny EISA na ny «Institut Électoral pour une Démocratie Durable en Afrique » miasa sy monina eto Madagasikara.
Manamarika ny fahavononan’ny EISA hiaraka hiasa amin’ny minisitera izao fitsidihana izao, indrindra eo amin’ny sehatry ny tanora sy ny fampandraisana andraikitra azy ireo eo amin’ny lafiny fiainam-pirenena.
Tafiditra anatin’izany fiaraha-miasa izany ny tetikasa Mahasaky izay mikendry ny fampiroboroboana ny fampandraisana anjara ny vehivavy sy ny tanora eo amin’ny sehatra politika sy ny fiainam-pirenena amin’ny alalan’ny fanamafisana traikefa sy fahaiza-manao.
Nohamafisin’ny minisitra tamin’izany fa anisan’ny tondrozotra hoentiny amin’izao fitantanany ny minisitera izao ny famerenana ny fahatokisan’ny tanora ny fitondram-panjakana izay mifandray indrindra amin’ny vinan’ny Filohan’ny Fanavaozana ny Repoblikan’i Madagasikara.
Zava-dehibe tokoa noho izany hoy ny minisitra ny fanamafisana ny fiaraha-miasa amin’ireo mpiara-miombon’antoka tahaka ny EISA izay ahafahana manome tosika ny tanora amin’ny fandraisan’anjaran’izy ireo amin’ny fampandrosoana ny firenena.