Tao aorian’ny lozam-pifamoivoizana niseho ny 04 Martsa 2023 tao Talala Ampano dia tonga nanotrona sy nampahery ireo tanora niharan’ity loza ity tao amin’ny CHU Tambohobe Fianarantsoa ny Minisitry ny Tanora sy ny Fanatanjahantena, Andriamatoa André Haja RESAMPA sy Ramatoa VINA Marie-Orléa, Minisitry ny Tontolo Iainana sy ny Fampandrosoana Lovainjafy niaraka tamin’ireo mpiara-miasa aminy.
Tamin’ny anaran’izy mianadahy Minisitra ireo no nanoloran’ny Fitondram-panjakana tohana hoan’ny tanora niharam-boina rehetra sy ny famangiana ho an’ny fianakaviana mana-manjo.
Marihana tsara fa noraisin’ny Fitondram-panjakana tanteraka tamin’ny alalan’ny Minisiteran’ny Fahasalamana ny sarany fitiliana sy ny fitsaboana rehetra.
Tsy hadino ihany koa ny manolotra ny fisaorana mitafotafo hoan’ny Solombavambahoaka, ny Governora, ny Préfet, ireo Ben’ny Tanàna sy ny Fitaleavam-paritra izay niara-nientana tamin’ny fikarakarana rehetra raha vao nanomboka nitranga ny loza ka mandrak’androany.
Miray fo tanteraka sy mankahery ary mirary fahasitranana haingana ho an’ireo tanora niaram-boina tamin’ity lozam-pifamoivoizana ity ny Minisiteran’ny Tanora sy ny Fanatanjahantena.
