Notanterahana ny 04 Jolay 2022 teny amin’ny Hôtel RADISSON BLU ny fampahafantarana voalohany ny fandraisan’i Madagasikara ny Afrobasket U18.
Naseho nandritra izany ny sary famantarana ity fifaninanana ity ary
androany ihany koa no nampahafantarana tamin’ny fomba ofisialy ireo mpiara-miombon’antoka lehibe amin’ny Federasionina Malagasy ny taranja Basketball amin’ny fandraisana ity fifaninanana ity.
Voalohany amin’izany ny Minisiteran’ny Tanora sy Fanatanjahantena izay nampatsiahy ny fanapahan-kevitry ny Filankevitry ny Minisitra tamin’ny faha- 25 May, izay nanekena ny handraisana io fifaninanana io, izay midika tanteraka fa raharaham-pirenena ny fanatanjahantenana ho an’ny Fanjakana Malagasy.
Tonga nanome voninahitra izany fotoana izany ireo tompon’andraikitra isan-tsokajiny eto anivon’ny Minisitera, izay notarihan’i Ramatoa Rosa RAKOTOZAFY, Tale Jeneralin’ny Fanatanjahantena, izay nisolotena an’Andriamatoa Minisitra TINOKA Roberto.
