MINISTRY NY JONO SY HARENA MANGA ARY NY MINISTRA LEFITRA MISAHANA NY TANORA
MAMETRAKA PAIK’ADY IOMBONANA HANOMEZANA ASA NY TANORA
Manana harena miafina azo hanasoavana ny mponina ao aminy indrindra ny tanora isika malagasy indrindra ho an’ireo izay monina amin’ny fari-dranomasina sy manakaiky ireo farihy sy renirano. Samy resy lahatra ireo Ministra misahana ny Jono sy harena manga Andriamatoa MAHATANTE Paubert ary ny Ministra lefitra misahana ny tanora Ramatoa Juliana RATOVOSON fa harena mankadiry ihany koa ho an’ny firenena ny fananana tanora izay mandrafitra ny 70% ny mponina eto Madagasikara.
Ireo no hery afaka mampiodina ny toekarena amin’ny fanampiana azy ireo amin’ny seham-pihariana sy fandraharana izay ataony toy ny jono, fambolena, fiompiana sy ny maro hafa.
Mifanjohy araka izany ny paik’ady eo amin’ny Ministera roa tonta dia ny hampisitraka ny tanora ny sahan’asa sy fandaharan’asa ho fampandrosoana azy ireo toy ny fahaizana manodina ny vokatra andranomasina na andranomamy.
Ao ihany koa ny fanamorana hahazoan’ny tanora ny karatra maha-mpanjono azy na ny famporisihana azy ireo hisehatra bebe kokoa amin’ny mahamatihanina sy ny maro hafa. Anisany ifotorana ihany koa ny fampisitrahana ireo tanora sy ny mponina hianoka ny vokatra ratoviny ankoatra ny fampidirana loharanom-bola.
Tsy adino ny famoronana asa sy fanentanana ny tanora ho saro-piaro amin’ny fiarovana ny tontolo iaianana manodidina sy anaty ranomasina izay iankinan’ny fiainan’izy ireo.
Antenaina fa ao anatin’izao fifanantonana akaiky izao izay harafitra anaty fifanaraham-piaraha-miasa dia hiteraka vokatsoa ho an’ny tanora malagasy. Ny fiaraha-misalahy no mampandeha lavitra sy hoentina manatratra ny tanjona satria ny tanora izay ambara hoe « transversal » tokoa dia voakasiky ny sehatra maro sahanin’ireo Ministera isan-tsokajiny.
Tanjonina araka izany ny hanatanteraka miaraka ny veliranon’ny « Plan Emergence Madagascar » mahakasika ny velirano faha-6 « Asa mendrika ho an’ny tanora », sy faha-8 « Fampizakan-tena ny tanora », ary faha-9 dia ny fampiroboroboana ny « Fizakan-tena ara-tsakafo ».
Alefa Tanora, Alefa Madagasikara